എട്ടുകൊല്ലം കൊണ്ടാണ് എന്റെ വീട് പണി പൂർത്തീകരിച്ചത്. ആ നീണ്ട കാലയളവിൽ വീടുപണി പലതും എന്നെ പഠിപ്പിച്ചു . ഒരുപക്ഷെ നിങ്ങളിൽ പലരും വീടെന്ന സ്വപ്നത്തിലേക്ക് കടക്കുന്നവരാകാം. എനിക്ക് ഉണ്ടായ നേട്ടങ്ങളും കോട്ടങ്ങളും അറിഞ്ഞിരിക്കുന്നത് നിങ്ങൾക്ക് ഉപകരപ്രദമായേക്കാം.
1 . വില കുറഞ്ഞ, വയൽ പോലുള്ള സ്ഥലങ്ങൾ വാങ്ങിയാൽ വീട് വെക്കുമ്പോൾ ആ ലാഭം, മണ്ണടിച്ചും , ഫൗണ്ടേഷനുള്ള അധിക ജോലിയിലും ഒലി ച്ചു പോയേക്കാം. സ്ഥലം വാങ്ങുമ്പോൾ ഉണ്ടാവുന്ന ആശ്വാസം നിർമ്മാണം തുടങ്ങുമ്പോൾ ദീര്ഘനിശ്വാസമാവുമെന്ന് ചുരുക്കം.
2 . പണം എത്ര കുറവാണെങ്കിലും താഴ്ന്ന സ്ഥലങ്ങളിൽ തറയുടെ ഉയരം കുറയ്ക്കരുത് . ഇരുപുറത്തുമുള്ള സ്ഥലങ്ങൾ മണ്ണിട്ട് ഉയർത്തിയാൽ നമ്മുടെ വീട് സ്വിമ്മിങ് പൂൾ ആവും അഥവാ കണ്ണീർ കടൽ ആവും.
3. അടിത്തറ ഇടുന്ന ജോലി, കുഴികുത്തി മണ്ണിൽ കല്ല് കുഴിച്ചിടുന്ന വെറുമൊരു കലാപരിപാടിയല്ല . എന്നാൽ പലരും ഏറ്റവും ലാഘവത്തോട് കാണുന്നതും ഇത് തന്നെ. അടിത്തറ ഇടുന്നതിൽ ചിലവ് ലഭിക്കാൻ ശ്രമിക്കരുത് . വീടിന്റെ നിൽപ്പ് അടിത്തറയിലാണെന്നു ഓർക്കുക.
4 . വരച്ചു കിട്ടിയ പ്ലാൻ നോക്കിയാൽ പലപ്പോഴും സാധാരണക്കാരന് ഒന്നും മനസിലാവില്ല. റൂമിന്റെ വലുപ്പം പോലും കൃത്യമായി പിടികിട്ടില്ല. ( പ്രത്യേകിച്ച് സ്ത്രീകൾക്ക് ) . പണി പൂർത്തിയാകുമ്പോഴാണ് ഇതെന്തു “പ്ലാൻ” എന്ന് ചിന്തിച്ചു അന്തിചു നിൽക്കുക .
5 . എൻജിനീയർ വരച്ചുതരുന്ന പ്ലാനിനെ മാത്രം ആശ്രയിക്കാതെ , ബന്ധുക്കളുടെയോ, സുഹൃത്തുക്കളുടെയോ വീടുകൾ നേരിട്ട് കണ്ടു , നമ്മുടെ ആവശ്യങ്ങൾ കൂടി പരിഗണിച്ചു നിർമ്മിച്ചാൽ മനസിലാകാത്ത പ്ലാനിൽ കെട്ടി പൊക്കുന്നതിനേക്കാൾ മെച്ചമാകും . ഒപ്പം ആ വീടുകളിൽ താമസിക്കുന്നവരുടെ അഭിപ്രായങ്ങൾ തേടുക .പുതിയ വീട്ടിൽ താമസിച്ചതിനു ശേഷമുള്ളവരുടെ അഭിപ്രയങ്ങൾ നമുക്ക് പറ്റിയേക്കാവുന്ന തെറ്റുകുറ്റങ്ങൾ ഒഴിവാക്കാൻ സഹായിക്കും .
6 . സിറ്റ് ഔട്ടിലെ ( കോലായിലെ ) സൺഷേഡ്, സ്റ്റെപ്പുകൾ നനയാത്ത വിധം പുറത്തക്ക് നീട്ടി നൽകാൻ ശ്രദ്ധിക്കുക . അല്ലാത്ത പക്ഷം മഴക്കാലത്ത് സ്റ്റെപ്പുകൾ കരഞ്ഞൊലിക്കും. കാൽ വഴുതി വീണ് നമ്മളും കരയും!
7. ഏത് മോഡലിൽ പണിതാലും സൺഷെഡ് ആവശ്യമായ ഇടങ്ങളിൽ ഇടണം . ഒഴിവാക്കിയാൽ ചുവര് നനഞ്ഞു വെള്ളം അകത്തും, നമ്മൾ പുറത്തും നിൽക്കേണ്ടി വരും. ഒപ്പം ഇലക്ട്രിക് വയറുകൾ നനഞ്ഞു കറണ്ട് അനാവശ്യമായി നഷ്ടമാകും .
8 . നിലത്ത് വിരിക്കുന്ന ടൈൽസും , മാർബിളും പൊട്ടി വിണ്ടു കീറിയാൽ നമുക്ക് അത് വിരിച്ചവരുടെയോ , അല്ലെങ്കിൽ ആ പ്രൊഡക്ടിന്റെ കുഴപ്പമായോ തോന്നാം . എന്നാൽ പലപ്പോഴും ഇതിലെ വില്ലൻ തറയുടെ കോൺക്രീറ്റിംഗ് ശരിയാകാത്തതാകാം . ലക്ഷക്കണക്കിന് രൂപയാണ് ഫ്ലോർ ഫിനിഷിങ്നായി ചിലവഴിക്കേണ്ടി വരുന്നത്! ആ സ്ഥിതിക്ക് വിലകൂടിയ ടൈലുകൾ വിരിക്കുന്ന നിലം ഉറപ്പാക്കി എടുക്കേണ്ടതല്ലെ ?
9 . ഏതൊരു വീട്പണിയുടെയും അവസാന “അടി വലിവിന്റെ ” ഘട്ടത്തിലാണ് ഫ്ലോർ വർക്ക് തുടങ്ങുക .അത് കൊണ്ട് തന്നെ അഡ്ജസ്റ്റ്‌ മെന്റിന് കീഴടങ്ങേണ്ടി കോളിറ്റി കുറയ്‌ക്കേണ്ടി വരുന്നതും അതിൽ തന്നെയാവും . വീടിന്റെ നിലം നന്നായാൽ പാതി നന്നായി എന്നാണ് . അതിനാൽ പിന്നീട് ചെയ്യാൻ മാറ്റിവെക്കേണ്ടി വന്നാലും നിലത്ത് വിരിക്കുന്ന ടൈലിന്റെയോ ഗ്രാനൈറ്റിന്റെയോ ഗുണ നിലവാരത്തിൽ കോംപ്രമൈസ് ചെയ്യരുത് .
10 . തുടച്ചു വൃത്തിയാക്കാൻ മടിയില്ലെങ്കിൽ തറയ്ക്ക് വൈറ്റ് ഷേഡിലുള്ള ഫ്ളോറിങ് പോലെ ചേരുന്ന മറ്റൊന്നില്ല . അവ വെളിച്ചം നിലനിർത്തും എന്ന് മാത്രമല്ല , ഒരു പോസറ്റീവ് എനർജി നൽകും. അനുഭവം ഗുരു !. ( ചെളി പറ്റിയാൽ പെട്ടന്ന് അറിയും എന്നാണ് വാദം എങ്കിൽ , നിങ്ങളുടെ കുഞ്ഞുങ്ങൾ ആ കനത്ത ചേറിലാണ് ഇഴഞ്ഞു നടക്കുക, നമ്മൾ കാണുന്നില്ല എന്നത് കൊണ്ട് ആ അഴുക്ക് അവിടെ ഇല്ലാതാകുന്നില്ലല്ലോ )
11 . കോമൺ ബാത്ത്റൂമും , വാഷ് ബേസിനും ഡൈനിങ് ടേബിളിന് സമീപം നൽകരുത് . പണ്ട് ഭക്ഷണത്തിന് അകത്തേക്കും, മലശോധനയ്ക്ക് പുറത്തേക്കും പോയിരുന്ന നമ്മൾ, ഇന്ന് നേരെ തിരിച്ചാണ് . ടോയിലറ്റ് എന്തൊക്കെയിട്ട് വൃത്തിയാക്കി എന്ന് പറഞ്ഞാലും അത് അരോചകമായി അനുഭവപ്പെടും.
12 . റൂമുകൾ , സിറ്റിംഗ് ഹാൾ , അടുക്കള തുടങ്ങിയവയ്ക്ക് ഇരുവശങ്ങളിലും ജനലുകൾ വരുന്നുണ്ടെന്നു പ്ലാൻ വരക്കുമ്പോഴേ ഉറപ്പാക്കണം .
13 . ജനൽ പാളികൾ ഉണ്ടാക്കുമ്പോൾ മുകൾ ഭാഗം തുറന്ന് ഇടാൻ കഴിയുന്ന രീതിയിൽ ഒരു പൊളി ചെറുത് ഉണ്ടാക്കിയാൽ കറണ്ട് ഇല്ലാത്ത അവസരങ്ങളിൽ ഉപകാരപ്പെടും.
14 . മുൻവാതിലിൽ പന്ത്രണ്ട് താഴുള്ള പൂട്ടു ഫിറ്റ് ചെയ്യുന്ന നമ്മൾ അടുക്കള വാതിൽ ഒരു നട്ടും ബോൾട്ടിലും ഒതുക്കും . കള്ളന് സുഖവും എളുപ്പവുമുള്ള പ്രവേശനം അടുക്കള വാതിൽ ആയിരിക്കെ മാറി ചിന്തക്കേണ്ട സമയം അതിക്രമിച്ചു . അതു പോലെ ഉള്ളിൽ നിന്നും ബലപ്പെടുത്തേണ്ട വാതിൽ ആണ് സ്റ്റെയർ കേസിനു മുകളിലെ വാതിൽ. അത് പട്ടയും കമ്പിയും അടിച്ചു ബലപ്പെത്തുക തന്നെ വേണം .
15 . അടുക്കള വലിയ വലിയ വിസ്തൃതിയിൽ ഉണ്ടാക്കാത്തതാണ് നല്ലത്. വീതിയെക്കാൾ നീളം അല്പം കൂടിയാൽ കിച്ചനിലെ ടേബിളുകൾക്കിടയിലുള്ള നടത്തത്തിന്റെ ദൈർഘ്യം കുറയും .
16 . എത്ര ചെറിയ വീടാണെങ്കിലും ഉള്ളിൽ കയറിയാൽ ഒരു കുടുങ്ങിയ അവസ്ഥ ഫീൽ ചെയ്യരുത് . പാസേജുകൾക്കായി ഒരുപാട് സ്ഥലം നീക്കി വെക്കുന്നത് വലിയ വീടുകളിലും കുറഞ്ഞ സ്ഥലസൗകര്യം സൃഷ്ടിക്കും .
ഇലക്ക്‌ട്രിക്ക് പ്ലാൻ , പ്ലബിംങ് പ്ലാൻ.
നമുക്ക് ഏറെയും രണ്ടു പ്ലാനേ കാണു. എങ്ങിനെയെങ്കിലും വീട് വെക്കാനുള്ള “തത്രപ്പാട് പ്ലാനും” , എൻജിനീയർ വരച്ചു തരുന്ന സ്ട്രക്റ്ററൽ പ്ലാനും. അതുകൊണ്ട് തന്നെ മേൽപ്പറഞ്ഞ രണ്ടു പ്ലാനുകളും നമ്മുടെ ചിന്തകൾക്ക് പുറത്താണ് .
ഇലക്ക്‌ട്രിക്ക് പ്ലാൻ.
ഇത് നമ്മുടെ ആവശ്യങ്ങൾ പറഞ്ഞു വരപ്പിച്ചു വയറിങ് ചെയ്യുന്നവർക്ക് കൊടുക്കണം. അല്ലാത്ത പക്ഷം കോട്ടങ്ങൾ ഉണ്ടാകാം.
1 . വീട്ടിനകത്ത് വള്ളിപ്പടർപ്പ് പോലെ എക്സ് സ്‌റ്റെൻഷൻ വയർ തലങ്ങും വിലങ്ങും പടർന്നു പന്തലിക്കും .
2 . ഫ്രിഡ്ജ് വെക്കാൻ ഉദ്ദേശിച്ചിടത്ത്, മോട്ടറും , മോട്ടർ ഉദ്ദേശിച്ചിടത്ത് മിക്സിയും വരും .
3 . കിടക്കുന്ന കട്ടിലിൽ തന്നെ ഇസ്തിരിപ്പെട്ടിയുമായി ശരണം പ്രാപിക്കേണ്ടി വരും .
4 . ബാത്‌റൂമിൽ കടന്നതിനു ശേഷം ഇരുട്ടിൽ സ്വിച്ച് തപ്പി കുഴങ്ങേണ്ടി വരും .
5 . പണിക്കാർ അവരുടെ എളുപ്പത്തിന് അനുസരിച്ചു വയർ വിലിച്ചും , സാധനങ്ങൾ വാങ്ങി കൂട്ടിയും ബഡ്ജറ്റ് കൂട്ടും.
Read Also ” വീട് ചോർന്നൊലിച്ചിട്ടു ടാർപായ വലിച്ചുകെട്ടിയാണ് ഞങ്ങൾ കഴിഞ്ഞിരുന്നത് .”
പ്ലബിംങ് പ്ലാൻ.
ഇതില്ലെങ്കിൽ പണി പാളുന്നത് കുളിമുറിയിലും അടുക്കളയിലും മാത്രമായിരിക്കില്ല . കാൽ കഴുകാൻ പുറത്ത് വെക്കുന്ന പൈപ്പ് പോലും അസ്ഥാനത്താവാം !
1 .വലിയ ടോയിലറ്റ് പണിത് , അതിലെ യൂറോപ്യൻ ക്ളോസ്റ്റ് അടക്കം, എല്ലാ ഫൈറ്റിങ്ങ്ങ്സുകളും ഒട്ടും അകലമില്ലാതെ വെച്ചാൽ , കുളിക്കുമ്പോൾ വെള്ളം ക്ളോസറ്റിൻമേൽ വീണ് നമ്മുടെ ദേഹത്തേക്ക് തെറിക്കും . അതൊരു വല്ലാത്ത ഈർഷ്യയാണ്. അതുപോലെ ടോയ്ലറ്റ് അധികം താഴ്ച്ച ഇല്ലാതെ ഫ്ലോർ ചെയ്യുക . ഇനിയുള്ള കാലഘട്ടത്തിൽ 60 വയസ്സ് കഴിയുമ്പോഴേക്കും ആരോഗ്യം ക്ഷയിച്ചു ചിലപ്പോൾ നടക്കാൻ പോലും പറ്റാത്ത അവസ്ഥയാകും. അല്ലെങ്കിൽ മുട്ട് വേദന കൊണ്ടും ചിലപ്പോൾ വീൽ ചെയർ ഉപയോഗിക്കേണ്ട അവസ്ഥയും വരാം. അപ്പോൾ ബാത്‌റൂമിൽ ഒരു ഇഞ്ച് താഴ്ച്ച യിൽ ഫ്‌ളോർ ചെയ്യുക.
ഗ്രൗണ്ട് ഫ്ലോറിൽ ഉള്ള ഒരു ബാത്‌റൂമിലെങ്കിലും അതുപോലെ ക്ളോസെറ്റിന് അടുത്ത് ചുമർ റ്റു ചുമർ ഒരു സ്റ്റീൽ പൈപ്പ് കൊടുക്കുക. പിടിച്ചു എണീക്കാൻ വേണ്ടി ബാത്‌റൂം സപ്പോർട്ട് ഫിറ്റിങ് വാങ്ങി ഫിറ്റ് ചെയ്യുക. ചുമരിൽ ഒരു കരുതൽ. നമ്മളും നാളെ വയസ്സാകാം എന്നൊരു ചിന്തയിൽ ഒരു കരുതൽ .
2 . വേസ്റ്റ് വെള്ളം പുറത്തേക്ക് പോവാനുള്ള കുഴി , കുളിക്കാനുള്ള പൈപ്പിനടുത്ത് തന്നെ സ്ഥാപിച്ചാൽ വഴുക്കൽ കൂടും എന്ന് മാത്രമല്ല അതിൽ വീഴുന്ന വെള്ളം നമ്മുടെ ശരീരത്തിലേക്ക് തെറിക്കുമ്പോൾ കുളിച്ച ഫീൽ അങ്ങ് പോകുകയും ചെയ്യും.
പ്ലമ്പിങ് പ്ലാൻ നമ്മുടെ ഉപയോഗത്തിനും സൗകര്യത്തിനും അനുസരിച്ചു ചർച്ച ചെയ്ത് വരപ്പിച്ചാൽ , ലക്ഷകണക്കിന് രൂപ ചെലവഴിച്ച കംഫർട്ട് റൂം കംഫർട്ടായി തന്നെ ഉപയോഗിക്കാം .
ബാത്റൂമുകളുടെ എണ്ണം കൂടുന്നതിന് അനുസരിച്ച് നമ്മുടെ ബഡ്ജറ്റ് കുത്തനെ ഉയരും .
Also Read കല്യാണം കഴിഞ്ഞു ഒരുവർഷത്തിനുള്ളിൽ ദമ്പതികൾ അറിഞ്ഞിരിക്കേണ്ട ചില സംഗതികളുണ്ട്.
ഇനി കുറച്ചു പൊതുവായുള്ള കാര്യങ്ങൾ.
1 .വലിയ വീടുകൾ എന്നാൽ സൗകര്യങ്ങൾ കൂടിയ വീടാവണമെന്നില്ല . ആവശ്യമുണ്ടെങ്കിൽ മാത്രം ഇരു നില വീടുകൾ വെയ്ക്കുക . മുകൾ തട്ട് ആവശ്യമില്ലാത്ത പക്ഷം വവ്വാലുകൾ വാടക തരാതെ താമസിക്കും .
2 . വീട് പണി തുടങ്ങുമ്പോൾ തന്നെ ലോൺ എടുക്കാതിരിക്കുന്നതാണ് നല്ലത് . കാരണം അടവും , വീട്ട് ചിലവും പലപ്പോഴും മുടക്കി അത് തടവറയിലാക്കും നമ്മളെ . അതോടെ പണി പകുതിക്ക് നിലയ്ക്കും.
3 . മെറ്റീരിയലുകൾ കഴിവതും സംഭരിച്ചു വെച്ചതിന് ശേഷം വീട് പണി തുടങ്ങാൻ കഴിഞ്ഞാൽ , അടിക്കടി ഉണ്ടാകുന്ന വിലക്കയറ്റത്തിൽ നിന്നും രക്ഷപ്പെടാം . ഒപ്പം, ലേബർ ചാർജ്ജും, മെറ്റീരിയൽ ചാർജ്ജും ഒരുമിച്ച് വഹിക്കേണ്ടി വരുമ്പോൾ നേരിടുന്ന “ശ്വാസതടസം” ഒഴിവാക്കുകയും ചെയ്യാം .
ഏതൊരു വീടും സുരക്ഷിതത്ത്വത്തിന്റെ മടിത്തട്ടിലേക്ക് സ്നേഹത്തോടെ നമ്മെ മാടി വിളിക്കുന്നതാവണം .
കറന്റ് പോയാൽ ജനിലൂടെ അടുത്ത വീട്ടിലേക്ക് നോക്കി അവിടെയും കറന്റ് ഇല്ലായെന്ന് സമാധാനിക്കുന്ന ഞാൻ അടക്കമുള്ള മലയാളി അടുത്ത വീടിനേക്കാൾ വലുപ്പമുള്ളത് വെക്കുന്നതിൽ നിർവൃതി കൊള്ളാതെ . സ്വന്തം ആവശ്യങ്ങളും , നീക്കിയിരിപ്പും തിരിച്ചറിഞ്ഞു വീട് പണിതാൽ കടമില്ലാതെ സ്വസ്ഥമായി കിടന്നുറങ്ങാം എന്നതാണ് ഞാൻ പഠിച്ച പാഠം .
മനോജ് കുമാർ കാപ്പാട് , കുവൈറ്റ്
Read Also സിമിത്തേരിയിൽ ഞാൻ കണ്ട ഏറ്റവും സുന്ദരമായ കാഴ്ച!!
Read also വീടിനോട് ചേര്‍ന്ന്‌ ബേബി നിര്‍മ്മിച്ച നീന്തൽക്കുളം ജനശ്രദ്ധ ആകർഷിക്കുന്നു.
Read Also വിഭവങ്ങളുടെ ധാരാളിത്തം കൊണ്ട് അനുഗ്രഹീതമായ നാടാണ് കേരളം
Also Read കരുണ കാണിക്കേണ്ട ഭർത്താവ് ഭാര്യയോട് കരുണ കാണിച്ചില്ലെങ്കിൽ അയൽപക്കത്തെ അങ്കിൾ കരുണ കാണിച്ചു തുടങ്ങും
Also Read ”സിസ്റ്റർ ഇൻജെക്ഷൻ ചെയ്താൽ എനിക്കും ഒരു സുഖം, സിസ്റ്ററിനും ഒരു സുഖം!”
Also read ” ഇന്നു ദാമ്പത്യമെന്നത്‌ ലൈംഗികബന്ധം മാത്രമായി മാറുന്നു.” മാർ ക്രിസോസ്റ്റം വലിയ തിരുമേനി
Also Read ലെഗിൻസ് ഇട്ടുവന്ന ടുണ്ടുമോൾ ഒറ്റ ഇരിപ്പ്. ദേവാലയത്തിലെ തിരശീല നടുവേ കീറി
About The Author
