ആദ്യത്തെ വീട് ദൈവാനുഗ്രഹം ഉള്ള വീട്. രണ്ടാമത്തെ വീട് കണ്ടോ, ഒരു ദൈവാനുഗ്രഹവും ഇല്ല.

പണ്ട് ഞാൻ ഒരു കൊച്ചച്ചൻ ആയിട്ട് ചില അച്ചന്മാരുടെ കൂടെ നടന്നിട്ടിട്ടുണ്ട് . എനിക്കുണ്ടായ ഒരു അനുഭവം പറയാം. ചില വീടുകളിൽ ചെന്നാൽ വല്യച്ചൻ അടിപൊളി പ്രാർത്ഥനയാണ്. കർത്താവായ യേശുവേ ഈ ഭവനത്തെ മൊത്തം സമർപ്പിച്ച് ഞാൻ പ്രാർത്ഥിക്കുന്നു എന്നൊക്കെ പറഞ്ഞ് ഭയങ്കര പ്രാർത്ഥന! അതേസമയം ഒരു പാവപ്പെട്ട വീടാണെങ്കിൽ വലിയ പ്രാർത്ഥന ഒന്നുമില്ല. കർത്താവേ ഈ ഭവനത്തെ കാത്തുകൊള്ളണമേ! അത്രയേ ഉള്ളൂ. പണ്ട് ഞങ്ങൾ ഡീക്കന്മാർ ആയിരിക്കുമ്പോൾ ഒരു അച്ചൻ ഒരു ധ്യാനപ്രസംഗത്തിൽ പറഞ്ഞ ഒരു സംഭവം പറയാം .

അച്ചനും കൊച്ചച്ചനും കൂടി ഭവന സന്ദർശനത്തിന് പോയി. ആദ്യമേ ഒരു അടിപൊളി വീട് കണ്ടു. നല്ല ഡോബർമാൻ പട്ടികൾ ഒക്കെ ഉള്ള മനോഹരമായ ഒരു വീട്. റിമോട്ട് വെച്ചാണ് വീടിന്റെ ഗേറ്റ് തുറക്കുന്നത് .

മുറ്റത്ത് ടൈൽസ് ഇട്ടിട്ടിരിക്കയാണ് . പിന്നെ പൂന്തോട്ടം. സർവ്വ ആഡംബരങ്ങളും ഉള്ള ഗംഭീരമായ ഒരു വീട്. ഗേറ്റിങ്കൽ നിന്ന് അച്ചനും കൊച്ചച്ചനും കൂടെ ബെല്ലമർത്തി. കുറച്ചു കഴിഞ്ഞപ്പോൾ ഗേറ്റ് തനിയെ തുറന്നു. അച്ചനും കൊച്ചനും കൂടി അകത്തു കയറി.

Also Read ഒരു ദുരന്തത്തെ ഒഴിവാക്കാൻ നിനക്ക് സാധിക്കുമോ ? അതാ പ്രവചനം.

വീടിനകത്ത് ചെന്നപ്പോൾ ഒരു ചേച്ചി ഉണ്ട് . മനോഹരമായ , പൂച്ച കണ്ണുള്ള സുന്ദരിയായ, വെളുത്തുതുടുത്ത ഒരു ചേച്ചി. ഇതൊക്കെയാണല്ലോ നമ്മുടെ സൗന്ദര്യ സങ്കല്പം . പെണ്ണിന് പൂച്ചകണ്ണ് വേണം. എന്നാലേ
സുന്ദരി ആകൂ . ( കർത്താവിനെയും നമുക്ക് അങ്ങനെ കാണാൻ ആണല്ലോ ഇഷ്ടം . പൂച്ചക്കണ്ണും ചെമ്പൻമുടിയുമുള്ള കർത്താവ് . കർത്താവിനു എവിടെയായായിരുന്നു ചെമ്പൻമുടി എന്ന് എനിക്കറിയാൻമേലാ.)

അച്ചനും കൊച്ചച്ചനും വീടിനകത്തേക്ക് കയറിയപ്പോൾ ഈ ചേച്ചി ഓടി വന്ന് അയ്യോ അച്ചാ വരൂ വരൂ ഇരിക്കൂ ഇരിക്കൂ എന്നൊക്കെ പറഞ്ഞു പറഞ്ഞു നല്ല കസേരകൾ ഒക്കെ കാണിച്ചു കൊടുത്തു. അങ്ങനെ മനോഹരമായ കസേകളിൽ അച്ചന്മാർ രണ്ടുപേരും ഇരുന്നു.

എന്നിട്ട് അച്ചൻ ചോദിച്ചു നിന്റെ കെട്ടിയോൻ എന്തു പറയുന്നു? അങ്ങനെ ഓരോ വിശേഷങ്ങൾ തിരക്കി . കുറച്ചു കഴിഞ്ഞപ്പോൾ ചേച്ചി വെള്ളം എടുക്കട്ടെ അച്ചാ എന്ന് ചോദിച്ചു . വേണ്ട എന്ന് അച്ചൻ പറഞ്ഞു . പിന്നെ ചേച്ചി വെള്ളം എടുക്കാനൊന്നും പോയില്ല കേട്ടോ. അവസാനം അച്ചൻ ദീർഘമായ ഒരു പ്രാർത്ഥന നടത്തിയിട്ട് വലിയൊരു ആശീർവാദവും കൊടുത്തു. എന്നിട്ട് ചേച്ചിയുടെ തലയിൽ കൈവച്ച് ഭയങ്കരമായ ഒരു അനുഗ്രഹിക്കലും.

Also Read ഭാര്യമാർ അങ്ങനെ തുടങ്ങിയാൽ ഭർത്താക്കന്മാർ ദിവസം നോക്കാത്ത പെണ്ണുങ്ങളെ തേടി പോകും!

പിന്നെ അച്ചന്മാർ അവിടെ നിന്ന് ഇറങ്ങി മുൻപോട്ട് നടന്നു. രണ്ടു വളവു കഴിഞ്ഞു ഒരു കലുങ്ക് ഉണ്ട് . കലുങ്കിന്റെ സൈഡിൽ ഒരു കുടിൽ ഉണ്ട് . അതും ആ ഇടവകയിലെ വീടാണ്.

അവിടെ ഒരു അമ്മയും നാലഞ്ചു കാക്കിരി പീക്കിരി പിള്ളേരും. പിള്ളേര് തുണിയുമില്ല തുത്തലുമില്ലാതെ മുറ്റത്തുകൂടി ഓടി നടക്കുകയാണ്. അതിലൊരെണ്ണം ഇത്തിരി വലുതായിരുന്നു. റോഡിൽ അച്ചനെ കണ്ടതേ അമ്മേ ദേ അച്ചൻ അച്ചൻ എന്ന് വിളിച്ചു ആ കൊച്ചു കൈകാലിട്ടടിക്കാൻ തുടങ്ങി. ഉടനെ അച്ചൻ വളരെ വിഷമിച്ച് ആ വീട്ടിലേക്ക് കയറി. ഈ ചേച്ചി ആണെങ്കിൽ നാണക്കേട് കൊണ്ട്, കീറിപ്പറിഞ്ഞ സാരിയൊക്കെ സെറ്റ് ചെയ്തു ഒതുക്കിയിട്ട് അച്ചാ ചായ എടുക്കാം എന്ന് പറഞ്ഞു അവിടെ ഇരുന്ന ഒരു കലം എടുത്ത് സ്റ്റൗവിൽ വച്ചു. അച്ചന്മാർക്ക് ഇരിക്കാൻ കസേര ഒന്നും ഇല്ല . കട്ടിലിൽ ഒരു വെള്ള തോർത്ത് വിരിച്ചിട്ടിട്ടു ചേച്ചി ഇരിക്കാൻ പറഞ്ഞു . അവിടെ ആകപ്പാടെ വെള്ള ആയിട്ടു ആ ഒരു തോർത്ത് മാത്രമേ ഉള്ളൂ. ബാക്കി എല്ലാം ചെളിപിടിച്ചു കറുത്തിരിക്കുകയാണ് .

ഈ ചേച്ചിയുടെ സാരിയും കളറും ഒക്കെ കണ്ടപ്പോൾ അച്ചൻ ചായ വേണ്ട എന്ന് പറഞ്ഞു. കുറച്ചു കഴിഞ്ഞു അവിടെനിന്നു ഇറങ്ങി രണ്ടുവീട് കഴിഞ്ഞപ്പോൾ വല്യച്ചൻ കൊച്ചച്ചന് ഒരു ഉപദേശം. മകനെ നീ കണ്ടോ, ആദ്യത്തെ വീട് എന്തുമാത്രം ദൈവാനുഗ്രഹം ഉള്ള വീട്. രണ്ടാമത്തെ വീട് കണ്ടോ, ഒരു ദൈവാനുഗ്രഹവും ഇല്ല.

Also Read എത്ര പ്രായമായാലും പിണക്കമായാലും ദമ്പതികൾ ഒരു മുറിയിലെ കിടക്കാവൂ

ഇതാണ് നമ്മുടെ ദൈവാനുഗ്രഹ സങ്കല്പം! നിങ്ങൾ ഒന്ന് ഓർത്തുനോക്കിക്കെ, അവിടെ നാലഞ്ച് കുട്ടികളുണ്ട്. ഒറ്റയ്ക്കല്ല ആ അമ്മച്ചി അവിടെ. അവളുടെ ഭർത്താവ് വയലിൽ പണിക്ക് പോയിരിക്കുകയാണ്. സന്തോഷത്തോടെ കഴിയുകയാണ് ആ കുടുംബം. അതാണ് ദൈവാനുഗ്രഹം! അപ്പുറത്തെ വീട്ടിലാണെങ്കിലോ ? ഒരു ചേച്ചിയും ഒരു ഡോബർമാനും! വേറൊന്നുമില്ല. അവിടെയാണത്രെ ദൈവാനുഗ്രഹം കിടക്കുന്നത്. ഒരു ചേച്ചിയും പട്ടിയും ഉള്ള വീട് ദൈവാനുഗ്രഹം ഉള്ള വീട്!

വീടിന്റെ വലിപ്പം കണ്ടും കാറുകളുടെ എണ്ണം കണ്ടും ഒക്കെ ആണ് നമ്മൾ ദൈവാനുഗ്രഹം നിശ്ചയിക്കുന്നത് . ഇങ്ങനെയാണ് പലരും നമ്മളെ ദൈവാനുഗ്രഹം പഠിപ്പിക്കുന്നത്. ദൈവകൃപ ഉണ്ടോ നിനക്ക് സമ്പൽസമൃദ്ധി ഉണ്ടാകും. ഉണ്ടായിട്ട് എന്ത് ചെയ്യാനാണ് ?

ജീവിതകാലം മുഴുവൻ ഗൾഫിലും അവിടെയും ഇവിടെയുമെല്ലാം പോയി കിടന്നു കഷ്ടപ്പെടും. എന്നിട്ട് ആയുസു തീരാറാകുമ്പോൾ ഇങ്ങോട്ട് വരും . ഒടുവിൽ ഉണ്ടാക്കിയ പണം മുഴുവൻ ആശുപത്രിയിൽ കൊണ്ടുപോയി കൊടുക്കും. അപ്പോൾ സമാധാനം ആകും.

Also Read ”ഒന്നും കഴിക്കാൻ ഇല്ലാത്തവർ കഴിക്കുന്നതല്ല വിവാഹം.

എന്നാൽ ഇവിടെയായിരിക്കുമ്പോൾ ഇത്തിരി ആസ്വദിച്ചൊന്നു ജീവിച്ചു നോക്കിക്കേ. ഇടയ്ക്ക് ഭാര്യയേയും പിള്ളേരേയുമൊക്കെ കൂട്ടി പള്ളിയിൽ പോയി ഒന്ന് പ്രാർത്ഥിക്ക്. എവിടെയെങ്കിലും ഒരു യാത്രയൊക്കെ നടത്തി സന്തോഷമായിട്ട് ഒന്ന് ജീവിച്ചുനോക്ക് .

ദൈവം നമുക്ക് സന്തോഷമായി ജീവിക്കാൻ ഒരുപാട് കാര്യങ്ങൾ തന്നിട്ടുണ്ട് . നമ്മുടെ ഉള്ളിൽ വെറുപ്പും വിദ്വേഷവും കൊണ്ട് നടക്കുന്നതുകൊണ്ട് നമുക്ക് ഇതൊന്നും ചെയ്യാൻ പറ്റുന്നില്ല. നമ്മൾ വഞ്ചിക്കപ്പെടാൻ തല്പരരായി നിൽക്കുകയാണ് . വഞ്ചിക്കാൻ ആയിട്ട് നമ്മളെത്തന്നെ നമ്മൾ വിട്ടുകൊടുത്തിരിക്കുകയാണ് . എന്നെ വഞ്ചിച്ചോളൂ എന്ന് പറഞ്ഞുകൊണ്ട് . വിശ്വാസത്തിന്റെ കാര്യത്തിലും അങ്ങനെ തന്നെയാണ്.

അതുകൊണ്ട് വിശ്വാസത്തിൽ നിങ്ങളെ ആരും ചൂഷണം ചെയ്യാതിരിക്കാൻ നിങ്ങൾ നോക്കണം. നിങ്ങളുടെ മൃദുല വികാരങ്ങളെയും നിങ്ങളുടെ പരാജയങ്ങളെയും ആരും ചൂഷണം ചെയ്യാതെ ഇരിക്കട്ടെ. നിങ്ങളുടെ വേദനകളെ നിങ്ങളുടെ ബുദ്ധിമുട്ടുകളെ നിങ്ങളുടെ രോഗങ്ങളെ ആരും ചൂഷണം ചെയ്യാൻ ഇടവരരുത് .

നമ്മുടെ ജീവിതത്തിൽ വേദനകളും പരാജയങ്ങളും വരുമ്പോൾ നമ്മൾ നിസ്സഹായരായി പോവും. ആര് എന്നെ ഇതിൽ രക്ഷിക്കും എന്ന ചിന്തയുമായി നമ്മൾ ഓടിനടക്കും.

Also Read എത്ര ദേഷ്യം വന്നാലും ഭാര്യ ഭർത്താവിനോട് മിണ്ടാതിരിക്കരുത്

എന്റെ ജീവിതത്തിൽ ഒരു പ്രശ്നം ഉണ്ടായപ്പോൾ ഒരു അച്ചൻ എന്നെ ഫോൺ വിളിച്ചിട്ട് നിനക്ക് കുറേ നാളുകൾ ആയിട്ട് പ്രശ്നങ്ങളാണ് കേട്ടോ. ഞാനൊരു ധ്യാനകേന്ദ്രത്തിന്റെ അഡ്രസ് തരാം. നീ എത്രയും വേഗം അവിടെപോകണം എന്ന് പറഞ്ഞു . ഞാൻ പറഞ്ഞു ”എന്റെ പൊന്നച്ചാ എന്നെ സംബന്ധിച്ചിടത്തോളം എനിക്ക് എന്റെ ഏറ്റവും വലിയ ധ്യാനം വിശുദ്ധ കുർബാന ആണ്. അതിൽ നിന്നും ഒന്നും കിട്ടിയില്ലെങ്കിൽ ലോകത്ത് ഞാൻ എവിടെ പോയാലും എനിക്ക് ഒന്നും കിട്ടാൻ പോകുന്നില്ല. അതാണ് എന്റെ വിശ്വാസം. അതുകൊണ്ട് ഞാൻ അങ്ങനെ ജീവിച്ചോളാം. എന്നെ കല്ലെറിയുന്നവർ എറിഞ്ഞോട്ടെ . വസ്ത്രാക്ഷേപം ചെയ്യുന്നവർ ചെയ്തോട്ടെ. എനിക്ക് പ്രത്യേകിച്ച് നഷ്ടമൊന്നുമില്ല. പറയേണ്ടവര് കിടന്നു പറഞ്ഞോട്ടെ . ” എന്ന് ഞാൻ പറഞ്ഞു
ഫാ.ജോജോ ( ആന്റണി ) തളികസ്ഥാനം . വീഡിയോ കാണുക

About The Author