ഒരു ഓഫീസിൽ ജോലി ചെയ്യുന്ന ഓഫീസർക്ക് ആ ഓഫീസിന്റെ പ്രവർത്തനങ്ങൾ എന്തൊക്കെയാണെന്ന് അറിയില്ലെന്നു വന്നാൽ ?
തിരുവനന്തപുരത്തു ധാരാളം സർക്കാർ ഓഫീസുകൾ ഉള്ള ഒരു ബഹുനില കെട്ടിടം ആണ് “വികാസ് ഭവൻ”.
ഏഴു നിലകളിളായി നിരവധി വകുപ്പു തലവന്മാരുടെ ഓഫീസ്സുകൾ ഇവിടെ പ്രവർത്തിക്കുന്നുണ്ട്…
ഒരു ദിവസം ഈ വികാസ് ഭവന്റെ താഴെത്തെ നിലയിലൂടെ നടക്കുമ്പോൾ ഒരു ഓഫീസിന്റെ മുൻപിൽ ഒരു ബോർഡ് കണ്ടു.”Kerala Land Use Board”.
ഞാൻ ആദ്യമായാണ് അന്ന് ഇങ്ങിനെ ഒരു ഓഫീസ്‌ ഉള്ളതായി അറിയുന്നത്. അതിന്റെ പ്രവർത്തനം ഒന്ന് അറിയുവാൻ ഓഫീസിന്റ ഉള്ളിൽ കയറി ആരോടെങ്കിലും ഒന്ന് അന്വേഷിച്ചുകളയാം എന്ന് തീരുമാനിച്ചു.
ഉള്ളിൽ കയറി. പല മുറികൾ ഉണ്ടെങ്കിലും ഒരു മുറിയിലും ആരെയും കണ്ടില്ല . നോക്കിയപ്പോൾ അഡ്മിനിസ്ട്രേറ്റീവ് ഓഫീസർ എന്നൊരു ബോർഡ് കണ്ടു. ആ മുറിയിൽ ഒരു വനിതാ ഓഫീസർ ഇരിക്കുന്നത് കണ്ടു. ആ മുറിയിലേക്ക് കയറി. സ്വയം പരിചയപ്പെടുത്തി. അവർ ഇരിക്കാൻ പറഞ്ഞു. വളരെ സൗഹാർദ പൂർവം സംഭാഷണം തുടങ്ങി.
”ഞാൻ കോഴിക്കോട്ടുനിന്നും വ്യവസായ ഡയറക്ടർ ഓഫീസിലേക്ക് വന്നതാണ്. ഈ ഓഫീസിന്റെ ബോർഡ് കണ്ടപ്പോൾ പ്രവർത്തനങ്ങളെ പറ്റി അറിയുവാനുള്ള ഒരു ആകാംക്ഷയിൽ കയറിയതാണ്. ഒരു മുറിയിലും ആരെയും കാണുന്നില്ല. അതാണ് ഈ മുറിയിൽ കയറിയത്.”
”ഓഫീസിൽ ഉള്ളവരെല്ലാം ഔദ്യോഗിക യാത്രകളിൽ ആണ്. അതാണ് കാണാത്തത്.” അവർ പറഞ്ഞു.
അപ്പോൾ ഞാൻ ആ ഓഫീസരോട് ഈ ഓഫീസിന്റെ പ്രവർത്തനങ്ങൾ എന്തെല്ലാമാണെന്ന് ചോദിച്ചു. മറുപടി വിചിത്രമായിരുന്നു.
“എനിക്കും ശരിക്ക് മനസ്സിലായിട്ടില്ല” എന്ന് ഓഫീസർ
”ഈ ഓഫീസിന്റെ അഡ്മിനിട്രേറ്റീവ് ഓഫീസർ ആയിട്ടും താങ്കൾക്ക് ഈ ഓഫീസിന്റെ പ്രവർത്തനങ്ങളെ പറ്റി അറിയില്ലന്നോ?” ആശ്ചര്യത്തോടെ ഞാൻ ചോദിച്ചു.
അപ്പോൾ സ്ത്രീ പറഞ്ഞത്, അവർ സെക്രട്ടറിയറ്റിൽ നിന്നും ഡെപ്യൂട്ടഷനിൽ വന്നതാണന്നും ഓഫീസിന്റെ ഭരണപരമായ കാര്യങ്ങളെ ശ്രദ്ധിക്കാറുള്ളൂ എന്നും.
പിന്നീട് ഞാൻ അന്വേഷിച്ച് അറിഞ്ഞു. കേരളത്തിന്റെ, മണ്ണ്, ജലം, സസ്യ, മൃഗ വ്യവസ്ഥകള്‍ തുടങ്ങിയ ഭൂവിഭവങ്ങളുടെയും ഭൂമിയുടെ സുസ്ഥിരവും അനുയോജ്യവുമായ ഉപയോഗത്തെ സംബന്ധിച്ച് ആവശ്യമായ നിര്‍ദ്ദേശങ്ങള്‍ നല്‍കുന്നതിന് വേണ്ടിയാണ് ലാൻഡ് യുസ് ബോര്‍ഡ് എന്ന്.
എന്നിട്ടും അന്ന് എനിക്ക് സംശയങ്ങൾ ബാക്കി? നിർദ്ദേശങ്ങൾ ആർക്കാണ് അവർ നൽകുന്നത്?
ആരാണ് അവ പ്രയോജനപ്പെടുത്തുന്നത് ? ഈ ഓഫീസിൽ നിന്നും ജനങ്ങൾക്ക് ലഭിക്കുന്ന സേവനങ്ങൾ എന്തെല്ലാമാണ്? സംശയം ഇപ്പോഴും ബാക്കിയാണ്!
എഴുതിയത് : ഇ. നാരായണൻ
ഈ പോസ്റ്റിന് കീഴിൽ വന്ന ചില പ്രതികരണങ്ങൾ ഇങ്ങനെ :
ഇത് പോലെ ഒരു ഉപകാരവുമില്ലാത്ത ആയിരക്കണക്കിന് ഉദ്യോഗസ്ഥരെയാണ് പൊതുജനം ഭീമമായ ശമ്പളവും പെന്ഷനും മറ്റു സർവ്വ ആനുകൂല്യങ്ങളും കൊടുത്തു തീറ്റിപോറ്റുന്നത്. ഇഷ്ടമുള്ളപ്പോഴൊക്ക പുതിയ പുതിയ തസ്തികൾ സൃഷ്ടിച്ചു അതിൽ ഇഷ്ടക്കാരെ കുത്തിനിറച്ചു പൊതു ഖജനാവ് കൊള്ളയടിച്ചു പോരുകയാണ്.
സർക്കാർ സേവനങ്ങളൊക്കെ എത്ര ലളിതമായും സുതാര്യമായും ചെയ്യാമെന്ന് ഈ കൊറോണ കാലത്ത് കുറച്ചെങ്കിലും നമ്മൾ മനസ്സിലാക്കിയതാണ്! ടെക്നോളജി ഇത്രയേറെ വികസിച്ച ഇക്കാലത്ത് അതിന്റെ സാദ്ധ്യതകൾ പരമാവധി ഉപയോഗിച്ച്, കുറഞ്ഞ മാൻ പവറിൽ വേഗതഏറിയ സേവനങ്ങൾ പൊതുജനത്തിന് ലഭിക്കുന്ന രീതിയിലുള്ള സംവിധാനങ്ങൾ നടപ്പിലാക്കുന്നതിന് പകരം സംസ്ഥാനത്തിന് ബാധ്യതയായി കുറേ വെള്ളാനകളെ അവിടങ്ങളിൽ പ്രതിഷ്ഠിച്ചു അലസന്മാരാക്കി മാറ്റുകയാണ് ഇപ്പോൾ ചെയ്യുന്നത്.
അത് പോലെ സംസ്ഥാനത്തിന് സാമ്പത്തിക ബാധ്യതയുണ്ടാക്കുന്ന, നഷ്ടത്തിലോടുന്ന എല്ലാ പൊതു മേഖല സ്ഥാപനങ്ങളും സ്വകാര്യവത്കരിക്കേണ്ട കാലം എന്നേ അതിക്രമിച്ചു.അയൽ സംസ്ഥാനമായ തമിഴ്നാടൊക്കെ ഇത് നടപ്പിലാക്കി തുടങ്ങി കഴിഞ്ഞു. കേരളത്തിൽ ഒരു സർക്കാരോ രാഷ്ട്രീയ പാർട്ടിയോ സർവീസ് യൂണിയൻ ഗുണ്ടകളെ ഭയന്ന് ഈ അനീതിക്കെതിരെ പ്രതികരിക്കില്ല. -Sebeer Ak
മറ്റൊരു പ്രതികരണം:
ഭരണപരിഷ്കാരകമ്മിഷൻ, യുവജനബോർഡ് തുടങ്ങിയവയൊക്കെ ഇതുപോലെ ഒക്കെ തന്നെ – Jaya Sunil
മറ്റൊരു പ്രതികരണം ഇങ്ങനെ :
അഡ്മിനിസ്ട്രേറ്റീവ് ഓഫീസർ എന്ന തസ്തിക നോൺ ടെക്നിക്കൽ പോസ്റ്റ് ആണ്. നിങ്ങൾ ഒരു മെഡിക്കൽ കോളേജിൽ പോയിട്ട് ഹ്യൂമൻ അനാട്ടമിയെ കുറിച്ച് അവിടത്തെ അഡ്മിനിസ്ട്രേറ്റീവ് ഓഫീസറോട് ചോദിക്കുന്നതു പോലെയാണ് ഇതും. ലാൻ്റ് യൂസ് ബോർഡ് ഒരു സൈൻറിഫിക് സ്ഥാപനമാണ്. അതിൻ്റെ പ്രവർത്തനങ്ങളെ കുറിച്ച് അവിടത്തെ സാങ്കേതിക വിദഗ്ധരുമായി സംസാരിച്ച് മനസിലാക്കൂ. തെറ്റ് നിങ്ങളുടെ ഭാഗത്താണ്.
സാങ്കേതിക സ്ഥാപനമായതിനാൽ അത്തരം വിഷയങ്ങളെ പറ്റി പൊതു ജനങ്ങളുമായി സംവദിക്കാൻ AO ക്ക് കഴിയില്ല. അങ്ങനെ ചെയ്താൽ അത് ശരിയുമല്ല. ആ ഓഫീസിലെ പ്രവർത്തനങ്ങളെ പറ്റി ആധികാരികമായി പറഞ്ഞു കൊടുക്കാൻ കഴിയുന്ന സയൻ്റിഫിക് ഓഫീസറേയോ മറ്റേതെങ്കിലും ടെക്നിക്കൽ ഓഫീസറേയോ അയാൾക്ക് ഗൈഡ് ചെയ്തു കൊടുത്താൽ മതി.
അഡ്മിനിസ്ട്രേറ്റീവ് ഓഫീസർ മാരെ സെക്രട്ടേറിയേറ്റിൽ നിന്നും വിവിധ ആസ്ഥാന ഓഫീസുകളിൽ നിയമിക്കുന്നത് അതാത് വകുപ്പിലെ നോൺ ടെക്നിക്കൽ വിഷയങ്ങൾ കൈകാര്യം ചെയ്യുന്നതിനാണ്. – S Neelakandan
About The Author
