ഇടുക്കി : ഓർമ്മയില്ലേ ഒൻപതു വര്‍ഷം മുന്‍പ് , കൃത്യമായി പറഞ്ഞാൽ 2011 നവംബറിൽ ഇടുക്കിയിലെ ജനങ്ങളെ രണ്ടുമാസക്കാലം ഭീതിയുടെ നടുക്കടലില്‍ എടുത്തിട്ടിട്ട് ‘ഇപ്പ രക്ഷിക്കാം’ എന്ന് പറഞ്ഞു തമിഴ് നാടിനെ നോക്കി മീശ പിരിച്ച് നമ്മുടെ രാഷ്ട്രീയ നേതാക്കന്മാര്‍ കളിച്ച മുല്ലപ്പെരിയാർ നാടകം ?
വെള്ളത്തില്‍ അലിഞ്ഞുകൊണ്ടിരുന്ന സുര്‍ക്കി കയ്യില്‍ വാരിയെടുത്തു കൊണ്ട് ഇതാ അണക്കെട്ട് പൊട്ടാന്‍ പോകുന്നു എന്ന് പറഞ്ഞു പേടിപ്പിച്ച മന്ത്രിയും ‘ വെള്ളം തരുന്നവരെ കൊല്ലരുതേ’ എന്ന് എന്ന് അലറി വിളിച്ച പാവങ്ങളുടെ പടത്തലവനും എവിടെയാണിപ്പോൾ ?
ഹര്‍ത്താല്‍, മനുഷ്യ ചങ്ങല, പ്രാര്‍ത്ഥന, ഉപവാസം ,നിരാഹാരം -എന്തൊക്കെയായിരുന്നു അന്ന് മേളം ! ഇടതന്മാരും വലതന്മാരും ദൃശ്യ ചാനലുകളില്‍ ഞെളിഞ്ഞിരുന്നു മത്സരിച്ചു നടത്തിയ ഭാവാഭിനയം കണ്ടപ്പോള്‍ ഇടുക്കിയിലെ ശുദ്ധഗതിക്കാരായ ജനങ്ങള്‍ വിശ്വസിച്ചുപോയി ഇത്തവണ പുതിയ ഡാം പണിതിട്ടെ ഇവർ സമരമുഖത്തുനിന്ന് പിന്മാറൂ എന്ന് .
ഒടുവിൽ പവനായി ശവമായി. അന്നത്തെ തമിഴ്‌നാട് മുഖ്യമന്ത്രി ജയലളിത ഒരു ആയുധം എടുത്തു പൊക്കിക്കാണിച്ചപ്പോൾ സത്യാഗ്രഹമിരുന്നവർ ചാടി എണീറ്റ് പൊടിയും തട്ടി കണ്ടം വഴി ഓടി.
എന്തായിരുന്നു ജയലളിതയുടെ ആ വജ്രായുധം ? ഇവിടുത്തെ രാഷ്ട്രീയ നേതാന്മാർക്കു തമിഴ്നാട്ടിലുള്ള അനധികൃത സമ്പാദ്യത്തെക്കുറിച്ചുള്ള വിവരങ്ങൾ പുറത്തുവിടുമെന്ന് ഒരു ഭീഷണി . അതോടെ മുല്ലപ്പെരിയാർ അണക്കെട്ടിന് സ്വയം ബലം വന്നു. ഒൻപതു വർഷം പിന്നിട്ടിട്ടും ഇപ്പോൾ അവിടെ ഒരു ബലക്ഷയവും ആരും കാണുന്നില്ല. മുല്ലപ്പെരിയാറിൽ അന്ന് അഭിനയിച്ച നടന്മാർ ഇപ്പോൾ പുതിയ റോളുകളിൽ മറ്റുപലസ്ഥലത്തും മികച്ച അഭിനയം കാഴ്ചവച്ചുകൊണ്ടിരിക്കയാണ് .
ഒരു മാസത്തേക്ക് മുല്ലപ്പെരിയാർ സമരം നിര്‍ത്തിവക്കുന്നു എന്നും പ്രശ്നം പരിഹരിച്ചില്ലെങ്കില്‍ പൂര്‍വാധികം ശക്തിയായി സമരം പുനരാരംഭിക്കുമെന്നുമാണ് 2011 ഡിസംബറില്‍ ചാനലുകൾക്ക് മുൻപിൽ നിന്ന് നേതാക്കന്മാർ പറഞ്ഞത് . ഒരു മാസമല്ല , ഒൻപതു വർഷം പിന്നിട്ടിട്ടും പിന്നെ ഒരു രാഷ്ട്രീയ പാർട്ടിയും അങ്ങോട്ടു തിരിഞ്ഞു നോക്കിയതേയില്ല . മുല്ലപ്പെരിയാറിൽ പുതിയ ഡാം കെട്ടുന്നതിനെപ്പറ്റി ആരും ഇപ്പോൾ മിണ്ടുന്നേയില്ല.
ഈ നേതാക്കന്മാരിൽ പ്രതീക്ഷ അർപ്പിച്ചു , ഇവരെ വിശ്വസിച്ചു മനുഷ്യ ചങ്ങലയിലും ഉപവാസത്തിലും പങ്കെടുത്തു സമയവും പണവും നഷ്ടപ്പെടുത്തിയ പോതുജനങ്ങള്‍ മണ്ടന്മാരായി .
മുല്ലപ്പെരിയാറിൽ ഓരോ ഇഞ്ചു ജലം ഉയരുമ്പോഴും വള്ളക്കടവിലും ചപ്പാത്തിലുമൊക്കെയുള്ള മനുഷ്യര്‍ അനുഭവിക്കുന്ന മനോവേദന ഇവര്‍ക്കറിയുമോ? പുതിയൊരു അണക്കെട്ട് പണിയുന്നതുവരെ ഇടുക്കിക്കാര്‍ക്ക് മനസമാധാനത്തോടെ ഒന്നുറങ്ങാനാവുമോ?
”ഇവിടെ നാലു ഡാമാണ് പൊട്ടാൻ പോകുന്നത്! ” ഈ പ്രസംഗം ഒന്ന് കേൾക്കൂAbout The Author
